Mickoski: Përkujtimi i Holokaustit është detyra jonë morale, dhe lufta kundër urrejtjes është përgjegjësia jonë historike

Shkup, 11 Mars, Zhurnal.mk – Qeveria e Maqedonisë së Veriut sot e ka shënuar 83-vjetorin e deportimit të 7,144 hebrenjve në Treblinka, duke dërguar kështu porosi kundër urrejtjes dhe respektimit të kujtesës.
“Sot qëndrojmë në heshtje dhe me respekt të thellë para njërës prej faqeve më të dhimbshme të historisë sonë. Sot kujtojmë deportimin e hebrenjve maqedonas – një tragjedi që ka shënjuar përgjithmonë kujtesën tonë kolektive. Në mars të vitit 1943, më shumë se shtatë mijë bashkëqytetarë tanë – hebrenj nga Shkupi, Manastiri dhe Shtipi – u mblodhën me forcë, u rrëmbyen fjalë për fjalë nga shtëpitë e tyre, nga familjet e tyre, nga jeta e tyre. Ata u deportuan në kampin e vdekjes Treblinka, ku jeta e tyre u shua mizorisht. Pas atij numri qëndrojnë emra, familje, ëndrra, talente, fate. Ka njerëz që ishin pjesë e strukturës së qyteteve tona, e tregtisë, e kulturës, e shpirtit të vendit. Me zhdukjen e tyre, vendi ynë humbi një pjesë të shpirtit të tij. Por sot nuk e kujtojmë vetëm tragjedinë. Ne kujtojmë edhe detyrimin. Detyrimin për të mos lejuar kurrë që urrejtja, antisemitizmi, racizmi dhe intoleranca të kenë vend përsëri në shoqëritë tona. Historia na mëson se e keqja fillon me një fjalë, me paragjykime, me indiferencë, » tha Kryeministri Hristijan Mickoski në ceremoni.
Në përkujtim folën edhe Kryetari i Bashkësisë Hebraike, Pepo Levi, si dhe Ambasadorja Gjermane Petra Drexler. Të pranishmit vendosën lule në memorialin në ish-Monopolin në Shkup.