Shkup, 15 korrik, Zhurnal.mk – Kryetari i Komunës së Çairit, Izet Mexhiti, ka marrë pjesë mbrëmjen e sotme në ceremoninë e organizuar nga Ambasada e Republikës së Turqisë në Shkup, me rastin e 15 Korrikut – Ditës së Demokracisë dhe Unitetit Kombëtar.
Përmes një postimi, Mexhiti theksoi se demokracia e dëshmon fuqinë e saj pikërisht në momentet kur përballet me sfida dhe kur qytetarët zgjedhin të mbrojnë lirinë, dinjitetin dhe vullnetin e tyre.
“Demokracia e tregon forcën e saj jo në ditët e qeta, por në çastet kur vihet në provë, kur një komb zgjedh lirinë, dinjitetin dhe vullnetin e qytetarëve të tij”, u shpreh Mexhiti.
Ai vlerësoi se 15 Korriku përfaqëson një datë me rëndësi të veçantë për Turqinë, duke kujtuar se demokracia nuk është një arritje e përhershme, por një vlerë që kërkon angazhim dhe mbrojtje të vazhdueshme.
“Kjo datë na rikujton se demokracia nuk është një monument i ngritur njëherë e përgjithmonë, por një vepër që duhet mbrojtur e ripërtërirë vazhdimisht me guxim, përgjegjësi dhe besim në liri”, theksoi ai.
Në përfundim, Mexhiti i uroi Republikës së Turqisë paqe, stabilitet dhe zhvillim të mëtejshëm, duke nënvizuar se marrëdhëniet ndërmjet dy vendeve mbeten të bazuara në respektin e ndërsjellë, bashkëpunimin dhe vlerat e përbashkëta.
“Turqisë, si vend mik dhe partner i rëndësishëm, i uroj paqe, stabilitet dhe zhvillim të mëtejshëm. Miqësia ndërmjet popujve tanë mbetet e ndërtuar mbi respektin e ndërsjellë, bashkëpunimin dhe vlerat që na afrojnë”, përfundoi Mexhiti.
