Presidenti i SHBA-së, Donald Trump, po shqyrton mundësinë e tërheqjes së trupave amerikane nga Gjermania, një opsion që administrata e tij e ka konsideruar që nga marrja e detyrës vitin e kaluar, transmeton Anadolu.
Sipas The Telegraph, burime pranë administratës thanë se “frustrimi që kemi pasur me evropianët ka qenë shumë real”, duke shtuar se “çdo vend që nuk paguan 5 për qind nuk duhet të lejohet të votojë për shpenzimet e ardhshme në NATO”.
Të gjithë anëtarët e NATO-s aktualisht ndajnë të paktën 2 për qind të PBB-së për mbrojtjen, një objektiv i vendosur në vitin 2014.
Shefi i NATO-s, Mark Rutte, tha se liderët do të duhet të paraqesin plane për të arritur objektivin e ri prej 5 për qind në një samit në Ankara më vonë këtë vit.
“Nuk duhet të kesh të drejtë të votosh për shpenzime të ardhshme nëse nuk kontribuon”, i tha një nga burimet gazetës The Telegraph.
Gazeta raportoi gjithashtu në mars të vitit të kaluar se Trump po shqyrtonte tërheqjen e personelit prej rreth 35 mijë personash aktiv nga Gjermania, një lëvizje që mund të tensionojë më tej marrëdhëniet SHBA-Evropë.
