Shkup, 11 Maj, Zhurnal.mk – Thirrja e kahmotshme e politikanëve shqiptarë në Maqedoni të Veriut për ruajtjen e votës së shqiptarëve nga copëtimi nëpër shumë parti politike dhe mos-djegien e votave të tyre, me 9 Maj mori një hap të pjesërishëm me shkrirjen e pesë partive në një të tillë, në VLEN.
Pas koalicionit VLEN i cili bëri bashkë pesë parti në zgjedhjet komunale, tash nga e Shtuna e kaluar partia VLEN nisë një hap të këtillë edhe për zgjedhjet parlamentare, si masë konkrete për të evituar humbje/djegie votash të partive të vogla, dhe pra evitimin e humbjes së ulëseve të shqiptarëve në parlament.
Kur koalicioni VLEN u formua, BDI-ja në kundër-përgjegje bëri një përpjekje sado pak të ngjashme, mirëpo jo edhe krejtësisht, sepse në kuadër të AKI u përfshinë edhe partitë e tjera të pakicave, duke tejkaluar konceptin për të cilin vite më parë bënte thirrje pikërisht kreu i BDI-së.
Pas zgjedhjeve komunale shpërthyen ndasitë në AKI. Disa prej partive hoqën dorë nga grupacioni me BDI dhe u larguan për të vazhduar rrugëtimin ndaras. AKI-ja pas “bashkimit” përsëri pësoi një shkapërderdhje, meqë nga aty dolën ASH e Selës dhe PDSH-ja.
Ajo që i ndodhi koalicionit AKI, pra rikthimi në të kaluarën, deri diku edhe mund të jetë e kuptueshme nëse shikohet kohëzgjatja e disa prej këtyre partive. Këtu mund të bëhet përjashtim Partia Demokratike Evropiane e Arjanit Hoxhës, e cila u shkri në strukturat e BDI-së.
Në të njëjtën kohë, partitë e grumbulluara tek VLEN-i e vazhduan këtë nismë, por edhe përtej një koalicioni me qëllim për t’u shndërruar në një parti të vetme, gjë që nuk ishte rasti tek koalicioni AKI i dominuar nga BDI.
Nga VLEN doli ASH e Taravarit, por të tjerët mbetën, përfshirë edhe një pjesë e ASH-së së tij.
VLEN-i vazhdon rrugëtimin në formë të re
Procese të këtilla të bashkimit në një subjekt politik e në një shtëpi poilitike të vetme nuk janë të lehta, sidomos kur partitë dhe krerët e tyre kanë krijuar identitet politik një kohë të gjatë në skenën publike.
E ardhmja do të dëshmojë se sa VLEN është përgjegje e duhur ndaj ndasive të politikanëve e që për pasojë e ndanë në dhjetëra vende edhe votën e votuesëve shqiptarë.
VLEN ndërkohë do të duhej të jetë edhe testim i vërtetë e hedhjes tutje të egos së politikanëve në shërbim të një trupi unik partiak.
Shndërrimi në një parti unike me një strukturë të vetme vendimarrëse, përkatësisht me më pak procedura e pra të thjeshtësuara, është më efikase në të gjitha aspektet, dhe më e fuqishme.
Edhe pse kaloi 9 Maji i VLEN-it të vjetër e krijimi i VLEN-it të ri, sfidave të brendshme do t’iu duhet edhe pak kohë për t’u përballuar e tejkauar krejtësisht.
Formula e dy kryetarëve, e dy nën-kryetarëve duket të jetë një proces urë-kalimi.
Koha do të tregojë nëse edhe kjo pjesë e strukturave të reja të VLEN-it do të jetë kalimtare apo e përhershme.
Një bashkim me një formulë të këtillë e bënë VLEN-in me efikas, më të shpejtë, më të fuqishëm e më të respektuar. Po aq edhe përgjegjësitë e VLEN-it të ri rriten e shtohen.
Por tash për tash dhe në të njëjtën kohë, vendimi për shkrirje në një parti, e arrinë synimin madhor të kahmotshëm, atë të ruajtjes së votës së votuesëve shqiptar nga copëzimi, përkatëisht djegia, shkruan zhurnal.mk. / Zhurnal.mk .
