Shkup, 17 prill Zhurnal.mk – Stojançe Jovanovski, i cili akuzohet për dhunë të rëndë në familje ndaj bashkëshortes së tij Ivana, gjë që çoi në atë që ajo tragjikisht t’i japë fund jetës së saj së bashku me vajzën e tyre gjashtëvjeçare, në sallën e gjyqit e akuzoi dëshmitarin Martin Sazdov se ia ka shkatërruar martesën, se ka qenë në lidhje dashurie me bashkëshorten e tij dhe se i ka futur drogë në makinë, ndërsa asaj i është kërcënuar me video me përmbajtje eksplicite. Prokuroria këmbëngul se Jovanovski manipulon dhe përpiqet të paraqitet si viktimë.
“Dëshmia e sotme e të akuzuarit Stojançe Jovanovski ishte e pritshme për mua si prokurore, që ai të vendoset në rolin e viktimës. Pra, të paraqitet në atë mënyrë, në vend që të jetë në rolin e kryerësit. Është përpjekje e qartë për të shmangur përgjegjësinë penale që i vihet në barrë,” tha Adela Bojçeviq, prokurore.
Jovanovski në dëshminë e tij askund nuk përmendi se e ka rrahur Ivanën, ai në mënyrë indirekte fajin për tragjedinë e drejtoi te Martin Sazdov. Sipas tij, Sazdov e ka goditur Ivanën derisa po udhëtonin me veturë drejt Gjykatës Penale, pas çka ajo ka humbur ndjenjat, ndërsa në ditën kur ndodhi tragjedia, të tre së bashku e kanë marrë gjashtëvjeçaren nga shkolla dhe janë nisur drejt banesës në bulevardin Teodosij Golloganov.
“Martini i tha ‘Shiko çfarë fëmije ke, a nuk të vjen keq ta humbësh? Po të isha në vendin tënd, më mirë do të vrisja veten sesa ta bëja këtë.’ Unë po luaja me Katjan dhe arritëm para ndërtesës sonë. Ivana insistoi që të ngjitej vetë me Katjan në banesë. Unë kundërshtova dhe u ngjitëm të gjithë së bashku. Kur desha të hyj në banesë për t’i pritur derisa të përgatiten, më erdhën ndër mend ato që më kishin vendosur në veturë dhe ua thashë këtë. Martini filloi të mohojë dhe më tërhiqte me forcë që të dal nga banesa,” deklaroi Stojançe Jovanovski, i akuzuar.
– Ivana këmbënguli që të ngjitet vetë në banesë
Prokurorja theksoi se si provë kanë një raport dhe mendim psikologjik për personalitetin e Jovanovskit, sipas të cilave ai ishte person që manipulon dhe me tendencë për ta shtrembëruar të vërtetën. Në sallën e gjyqit dëshmuan edhe ekspertë që kishin kryer autopsinë. Ata konfirmuan se Ivana kishte pasur lëndime në trup që ishin shkaktuar para se të ndodhte tragjedia, por edhe se në gjakun e Jovanovskit ishin gjetur shenja të kokainës dhe diazepamit. Stojançe Jovanovski akuzohet për veprat penale dhunë në familje, cenim të sigurisë dhe nxitje për vetëvrasje të bashkëshortes së tij, Ivanës.
