Shkup, 1 korrik Zhurnal.mk – Kryetari i Lëvizjes ZNAM, Maksim Dimitrievski, në konferencën e djeshme për media njoftoi se, në kuadër të rikonstruimit të Qeverisë, partia e tij do të marrë drejtimin e Ministrisë së Bujqësisë, Pylltarisë dhe Ekonomisë së Ujërave, e cila do të udhëhiqet nga sekretari i deritanishëm shtetëror i ministrisë, Borçe Serafimovski.
Serafimovski, i cili do ta zëvendësojë Cvetan Tripunovski, është pronar i kompanisë Trinity Energy, e cila në fund të vitit 2025 mori licencë për punë provuese të një centrali fotovoltaik në rajonin e Sveti Nikollës, me kapacitet rreth 3.5 megavat, një fuqi e konsiderueshme për standardet e Maqedonisë së Veriut.
Trinity Energy është kompani me seli në Shkup, e regjistruar në vitin 2024, në pronësi të vetme të Borçe Serafimovskit. Ai ka qenë profesor universitar, zëvendëskryetar i Bordit Drejtues të Universitetit Ndërkombëtar Sllav, si dhe drejtues i Universitetit të Veliko Tërnovos “Shën Kirili dhe Metodi”. Deri më tani ai ushtronte funksionin e sekretarit shtetëror në Ministrinë e Bujqësisë, Pylltarisë dhe Ekonomisë së Ujërave.
Në të njëjtën konferencë, Dimitrievski bëri të ditur se Goran Minçev do të vazhdojë të drejtojë Ministrinë e Administratës Publike. Ai shprehu gjithashtu mirënjohje për ministrin e deritanishëm të Drejtësisë, Igor Filkov, duke vlerësuar profesionalizmin, integritetin dhe përkushtimin e tij gjatë ushtrimit të detyrës.
