Tiranë, 4 orrik Zhurnal.mk – Ministri i Brendshëm i Republikës së Shqipërisë, Besfort Lamallari, ka deklaruar se shpallja “non grata” e Igballe Berishës nuk do të mbetet një rast i izoluar. Ai theksoi se institucionet shqiptare do të ndërmarrin të njëjtën masë ndaj çdo shtetasi të huaj që, sipas autoriteteve, vepron kundër interesave të Shqipërisë ose promovon agjenda që bien ndesh me orientimin evropian të vendit.
Sipas Lamallarit, vendimi ndaj Igballe Berishës u bazua në deklaratat e saj publike, të cilat ai i cilësoi si propagandë në mbështetje të khameneizmit. Ai shtoi se, duke qenë se Kuvendi i Shqipërisë e ka cilësuar Iranin si shtet sponsor të terrorizmit, çdo promovim apo nxitje në favor të strukturave të lidhura me të përbën shkelje të ligjit dhe mund të sjellë pasoja ligjore.
Ministri bëri të ditur gjithashtu se Drejtoria Antiterror monitoron vazhdimisht persona që konsiderohen me rrezik për sigurinë kombëtare, përfshirë edhe individë që marrin pjesë në protesta dhe që kanë precedentë apo janë në fokus të autoriteteve.
Në përfundim, Lamallari theksoi se institucionet ligjzbatuese disponojnë informacione të vazhdueshme për raste që kërkojnë vëmendje të veçantë dhe se nuk do të hezitojnë të ndërmarrin masa të tjera, përfshirë shpalljen “non grata”, ndaj çdo personi që vlerësohet se cenon interesat kombëtare dhe sigurinë e Republikës së Shqipërisë.
