Shkup, 17 korrik, Zhurnal.mk – Data kyçe për të ardhmen e procesit të zgjerimit të Bashkimit Evropian është 30 shtatori, kur Komisioni Evropian duhet të dalë me raport mbi qasjen e re ndaj zgjerimit, ka thënë presidentja Gordana Siljanovska-Davkova.
Në intervistën për televizionin Kanal 5, Siljanovska-Davkova theksoi se më 30 shtator, Komisioni Evropian së pari do të paraqesë modelin sipas të cilit do të zhvillohet procesi i mëtejshëm i zgjerimit, ndërsa më pas në tetor për të njëjtat çështje do të diskutojë edhe Këshilli Evropian.
“Këto janë momente që janë të rëndësishme për ne për të procesuar hapat që janë ende të mundshëm dhe për të cilat bisedohet”, theksoi presidentja.
Duke iu referuar marrëdhënieve me Bullgarinë, ajo deklaroi se pas kontakteve të fundit me presidentin bullgar Rumen Radev, sheh hapësirë për intensifikimin e dialogut dhe kërkimin e zgjidhjeve të përbashkëta.
“Përfundimi është se duhet shumë përpjekje, shumë vullnet i mirë për të bërë përparim. Duhet të investojmë diçka së bashku për të arritur një lloj zgjidhjeje”, theksoi Siljanovska-Davkova.
Ajo shtoi se Bullgaria lidhur me punët e jashtme po vepron në mënyrë të harmonizuar, pavarësisht dallimeve politike.
“Ne jemi një fenomen vërtet interesant këtu, ndryshe nga Bullgaria e cila vepron unanimisht kudo edhe kur nuk është në të drejtë”, theksoi Siljanovska-Davkova.
Duke iu referuar procesit eurointegrues presidentja vlerëson se ndryshimet kushtetuese në vete nuk përfaqësojnë një garanci se nuk do të lindin pengesa të reja në rrugën drejt Bashkimit Evropian.
“Rruga me siguri do të hapet për një moment, por pastaj përsëri do të shfaqet një pengesë e re. Duhet të anuloni burimin e pengesave, ai është Protokolli 2”, ka thënë Siljanovska-Davkova.
