Shkup, 8 shkurt- Zhurnal.mk – Zëdhënësja e Qeverisë së Maqedonisë së Veriut, Venera Azizi ka njoftuar se është arritur marrëveshja për rritjen e pagave për rreth 11 mijë të punësuar në administratë, gjykata dhe prokurori. Sipas saj, rritja do të nisë nga muaji mars dhe paraqet hapin e parë të një procesi gradual që synon rritje deri në 40 për qind.
Azizi theksoi se Qeveria mbetet e përkushtuar për përmirësimin e kushteve të punës në sektorin publik, duke investuar në fusha kyçe si arsimi, shëndetësia dhe administrata.
Postimi i plotë i Azizit:
“Këtë të diel po vijmë me lajme të mrekullueshme!
Arritëm marrëveshjen për rritjen e pagave të 11.000 të punësuarve në administratë, gjykatë dhe prokurori!
Rritja e pagave nis nga muaji mars dhe është hap i parë drejt një rritjeje graduale deri në 40%.
Si Qeveri kemi investuar dhe vazhdojmë të investojmë në arsim, shëndetësi, polici dhe administratë publike, duke dëshmuar se puna, profesionalizmi dhe dinjiteti i punonjësve janë prioritet real”, ka shkruar Azizi.
