Shkup, 12 mars, Zhurnal.mk – Enti Shtetëror i Revizionit i Maqedonisë së Veriut ka publikuar raportin e revizionit për raportet financiare dhe përputhshmërinë e punës së Inspektorati Shtetëror për Ndërtim dhe Urbanizëm për vitin 2024, duke evidentuar një sërë dobësish në funksionimin e këtij institucioni, transmeton Zhurnal.mk.
Sipas raportit, janë konstatuar mangësi në procesin e kryerjes së inventarit të aseteve dhe burimeve të fondeve, si dhe mungesë e vlerësimit të vlerës së tregut të objekteve ndërtimore. Po ashtu, revizioni ka evidentuar dobësi edhe në procesin e llogaritjes dhe pagesës së pagave.
Në raport theksohet gjithashtu mënyra e papërshtatshme e organizimit të mbikëqyrjes inspektuese në fushën e urbanizmit, si dhe mungesa e raporteve gjashtëmujore që lidhen me të dhënat për trajtimin e ankesave dhe propozimeve të qytetarëve.
Nga Enti Shtetëror i Revizionit bëhet e ditur se që nga viti 2018 funksionin e drejtorit të Inspektoratit Shtetëror për Ndërtim dhe Urbanizëm e kanë ushtruar ushtrues detyre për një periudhë më të gjatë se afati ligjor prej gjashtë muajsh. Sipas raportit, kjo situatë krijon rrezik që drejtimi i institucionit të kryhet nga persona që nuk i përmbushin kushtet e përcaktuara me ligj.
Revizioni ka vënë në dukje gjithashtu dobësi në procesin e bashkëpunimit dhe koordinimit ndërinstitucional gjatë trajtimit të ankesave dhe propozimeve, si dhe mungesë serioze të inspektorëve në këtë institucion.
Sipas raportit, kjo situatë mund të ndikojë në uljen e efikasitetit të mbikëqyrjes inspektuese në fushën e ndërtimtarisë dhe urbanizmit në vend.
