Ministri Ferati priti në takim Komisionerin e Lartë të OSBE-së, Ambasadorin Kamp

Nga D V
A+ A-
Rivendos

Shkup, 19 nëntor, Zhurnal.mk – Ministri i Marrëdhënieve ndërmjet Bashkësive, Agon Ferati, priti sot për takim Komisionerin e Lartë të OSBE-së për Pakicat Kombëtare, Ambasadorin Kristof Kamp, në kuadër të vizitë së tij zyrtare në Shkup.

Ministri e falënderoi ambasadorin për mbështetjen të cilën zyra e tij dhe Misioni i OSBE-së në Shkup po japin për përpilimin e Strategjisë së re për ndërkulturalizmin dhe kohezionin shoqëror, duke e siguruar se ky proces vazhdon të jetë transparent dhe gjithëpërfshirës.

Ai po ashtu theksoi se Maqedonia e Veriut i njeh grupet etnike si komunitete me status kushtetues dhe të drejta të barabarta, por që kohezioni shoqëror duhet kultivuar në një fazë të re të bashkëpunimit përtej menaxhimit të dallimeve e tensioneve të mundshme ndëretnike.

Ministri dhe ambasadori Kamp u pajtuan se, megjithëse shtetet kanë specifikat e tyre, praktikat e mira ndërkombëtare mund të ndihmojnë në tejkalimin e dallimeve midis komuniteteve të ndryshme si dhe t’u japin komunave një rol më të theksuar në zbatimin e strategjisë dhe masave për komunikim të shtuar ndëretnik.

Ministri Ferati i njoftoi përfaqësuesit e OSBE-së për prioritetet e strategjisë së re, sfidat e implementimit dhe u shpreh se në fokus të ministrisë janë kryesisht fusha e arsimit dhe puna me fëmijët e moshave shkollore si dhe me të rinjtë në përgjithësi, me qëllim të krijimit të hapësirave të përbashkëta për bashkëveprim dhe aktivitete të përbashkëta, pjesa më e madhe e të cilave nuk kërkon mjete të majme financiare, por mbi të gjitha vullnet të mirë dhe qasje pozitive.

artikuj të ndërlidhura

Kjo faqe interneti përdor cookies për të përmirësuar përvojën tuaj. Ne do të supozojmë se jeni dakord me këtë, por mund të çregjistroheni nëse dëshironi. Pranoj Lexo më tepër