Shkup, 19 shkurt – Marrëdhëniet e shkëlqyera dhe miqësore ndërmjet Maqedonisë së Veriut dhe Republikës së Irlandës, si dhe vullneti i përbashkët për thellimin e mëtejshëm të bashkëpunimit, u konfirmuan në takimin e zëvendëskryeministrit të parë dhe ministër i Çështjeve Evropiane, Bekim Sali me ambasadorin e Irlandës në vendin tonë, Brendan Uard.
Sali, siç kumtuan nga Kabineti i tij, shprehi mirënjohjen për mbështetjen parimore që Irlanda i jep politikës së zgjerimit të BE-së dhe perspektivës evropiane të vendit tonë.
Ai e theksoi përkushtimin e Qeverisë ndaj agjendës reformuese, veçanërisht në fushat e sundimit të ligjit, reformës së administratës publike dhe forcimit të institucioneve demokratike.
Në takim u diskutuan mundësitë për avancimin e bashkëpunimit bilateral, përfshirë përmes instrumenteve të Bashkimit Evropian si Twinning dhe TAIEX, si dhe përmes partneriteteve të drejtpërdrejta për forcimin e kapaciteteve administrative.
Nga Kabineti i ministrit të Çështjeve Evropiane informojnë se Ministria mbetet plotësisht e përkushtuar në forcimin e partneritetit me Irlandën në mbështetje të integrimit evropian të Maqedonisë së Veriut.
