Shkup, 8 maj, Zhurnal.mk – Zëvendëskryeministri i parë i Maqedonisë së Veriut, Bekim Sali, ka zhvilluar një takim me Sekretarin e Përgjithshëm të Këshillit të Evropës, Alain Berset, ku është riafirmuar bashkëpunimi i fuqishëm ndërmjet vendit dhe këtij institucioni evropian.
Gjatë takimit, bashkëbiseduesit kanë theksuar rëndësinë e thellimit të bashkëpunimit në fushën e sundimit të ligjit, reformave dhe mbrojtjes së të drejtave të njeriut, si prioritete kyçe në procesin e integrimit evropian.
“Mbështetja dhe ekspertiza e Këshillit të Evropës mbeten të rëndësishme në procesin tonë të integrimit evropian, veçanërisht në avancimin e reformave në drejtësi, luftën kundër korrupsionit dhe forcimin e institucioneve demokratike”, theksoi Sali.
Ai shtoi se Qeveria mbetet e përkushtuar në zbatimin e reformave dhe në vazhdimin e rrugës evropiane të Maqedonisë së Veriut.
