Shkup, 8 korrik, Zhurnal.mk – Skena politike shqiptare ka ndryshuar shumë dy vitet e fundit. Ka pasur bashkime e ndarje, koalicione e fragmentime të pafundme. Sot kur po shkruajmë në pushtet kemi një koalicion prej katër partive që u shndërruan në një subjekt të vetëm, dhe në opozitë kemi, BDI-në, ASH-në e Taravarit, LSH-në e Selës, dhe PDSH-në, gjithashtu edhe Lëvizjen Populli. Pra, po faktori politik shqiptar po kthehet një dekadë më herët kur në pushtet ishte një parti, BDI, dhe në opozitë kishte shumë parti, shkruan Zhurnal.
Rikthimi i modelit të vjetër opozitar
Lidhja Shqiptare e Ziadin Selës është një nga subjektet që po përpiqet të gjejë vendin e vet në këtë mozaik të ri politik. Krijimi i një partie të re nuk ishte thjesht një lëvizje organizative, por një tentativë për të rikthyer një identitet politik që sipas Selës ishte zbehur në kompromiset e shumta të opozitës së viteve të fundit. LSH u pozicionua që në fillim si parti që synon të mbajë qëndrim parimor, duke mos u afruar me pushtetin e Mickoskit, pavarësisht ofertave të mundshme. Narrativa e tyre është e qartë opozita duhet të jetë opozitë, jo një strukturë që pret momentin për t’u bërë pjesë e qeverisë.
Se LSH po tenton të shndërrohet në subjekt që nuk joshet nga pushteti e dëshmon edhe reagimi i fundit i deputetes së kësaj partie, lire Dauti, e cila ka akuzuar VLEN-in dhe BDI-në se, sipas saj, me veprimet e tyre po i shërbejnë VMRO-DPMNE-së në procesin e miratimit të Kodit të ri Zgjedhor.
Ajo pretendon se ndryshimet e propozuara do t’ua pamundësojnë shqiptarëve të diasporës votimin elektronik ose me postë edhe në zgjedhjet lokale, duke ndikuar drejtpërdrejt në rezultatet zgjedhore në disa komuna me shumicë shqiptare.
Në një reagim publik, Dauti iu drejtua qytetarëve shqiptarë duke vlerësuar se dy blloqet politike shqiptare, ndonëse në pozita të ndryshme, po veprojnë në favor të VMRO-DPMNE-së.
“Shqiptarë të dashur, VLEN dhe BDI po bashkëpunojnë, secili në mënyrën e vet, për t’i bërë hyzmetin VMRO-së”, deklaroi Dauti.
Sipas saj, kjo është dëshmuar së fundmi me nënshkrimin e Kodit të ri Zgjedhor të propozuar nga VMRO-DPMNE, për të cilin ajo thotë se përjashton diasporën nga mundësia e votimit elektronik ose me postë edhe në zgjedhjet lokale.
“Së fundmi, kjo u pa edhe me nënshkrimin e Kodit të ri Zgjedhor të propozuar nga VMRO, me të cilin diasporës po i ndalohet votimi elektronik ose me postë edhe për zgjedhjet lokale. Me këtë përjashtim, ata po ia mundësojnë VMRO-së fitoret e ardhshme në Kërçovë, Bërvenicë dhe Butel”, u shpreh deputetja. përcjell Zhurnal.mk .
Sfida e fragmentimit të opozitës shqiptare
Në terrenin aktual politik, LSH përballet me një sfidë të madhe fragmentimin e opozitës shqiptare. BDI mbetet partia më e strukturuar dhe më e madhe opozitare, me organizim të fortë dhe me rrjet të gjerë. ASH e Taravarit ka pozicionim të qartë pro‑reformave dhe po tenton të tërheqë votuesit e rinj, dhe aktualisht menaxhon me dy komuna. PDSH po kërkon rikthim me retorikë tradicionale, ndërsa Lëvizja Populli duket që nuk ka ambicie për tu rritur dhe zhvilluar tutje.
Opozita shqiptare është e shpërndarë, e paunifikuar dhe shpesh e fokusuar në konfliktet e brendshme. Kjo i jep LSH‑së hapësirë për të ndërtuar profilin e vet si parti e “parimeve”, duke u paraqitur si alternativë e pastër. Por ka edhe rreziqe pasi nëse LSH mbetet vetëm në retorikë parimore, pa struktura të forta dhe pa kapacitet mobilizues, mund të mbetet në vendnumëro. Votuesit shqiptarë në RMV historikisht kanë kërkuar parti që jo vetëm kritikojnë, por edhe ofrojnë zgjidhje konkrete dhe kapacitet për të ndikuar realisht në pushtet.
Prandaj, kuptohet qartë që Lidhja Shqiptare po tenton të etablohet si parti opozitare e qëndrueshme, por rruga është e vështirë. Ajo ka potencial të krijojë një profil të ri politik, por duhet të dëshmojë se parimet e saj nuk janë vetëm retorikë. Në muajt dhe vitet në vijim, do të shihet nëse LSH do të mbetet opozitë e pakompromis, apo do të ndjekë rrugën e njohur të politikës në RMV atë drejt pushtetit. /Zhurnal.mk
