Ndahet nga jeta gazetarja Irena Radovanoviq, humbje e madhe për gazetarinë maqedonase

Shkup, 08 maj, Zhurnal.mk – Pas një sëmundjeje të gjatë, në moshën 53-vjeçare ka ndërruar jetë gazetarja e MIA-s, Irena Radovanoviq, një nga figurat e njohura të gazetarisë maqedonase, veçanërisht në fushën e politikës së brendshme, njoftoi agjencia shtetërore e lajmeve.

Karrierën e saj gazetare e nisi në javören “Fokus” në vitin 1991, ku punoi deri në vitin 2001, pas së cilës vazhdoi në gazetën “Veçer” si gazetare në rubrikën e politikës së brendshme. Në vitin 2004 u bë pjesë e redaksisë së “Nova Makedonija”, ndërsa në vitet 2006 dhe 2007 punoi në gazetën e përditshme “Makedonija Denes” dhe javören “Denes”. Ajo ka punuar gjithashtu në javoret politike “Forum”, në gazetën “Dnevnik” dhe në Radion “Slobodna Makedonija”.

Pjesë e ekipit të agjencisë së lajmeve MIA u bë në vitin 2014, si gazetare në redaksinë e politikës së brendshme dhe gazetare-analiste.

Me largimin e saj, MIA dhe gazetaria maqedonase humbën një profesioniste të përkushtuar, e cila do të mbetet përgjithmonë në kujtesë.

“U largua Irena jonë. Luftuam për një vit e gjysmë. Vështirë, me dhimbje, por edhe me shpresë. Të vogël, por shpresë. Në fund, u dorëzua. Ka vite, muaj dhe ditë që janë vërtet të rënda. Këto janë pikërisht të tilla”, ka shkruar në Facebook drejtori i MIA-s, Darko Janevski.

Varrimi do të bëhet nesër në varrezat në Radishan, në ora 11:00, ndërsa ceremonia në kapelë fillon në ora 10:30.